ТАШРИФИ ГУРӮҲИ КОРИИ КИШВАРИ ҶУМҲУРИИ ИСЛОМИИ ЭРОН БА АКАДЕМИЯИ ВКД

21-уми майи соли 2025 Роҳбари ҳайати Гурӯҳи кории муштарак оид ба масъалаҳои тартиботи ҳуқуқӣ ва амниятӣ аз ҳисоби Вазорати кишвари Ҷумҳурии Исломии Эрон, ҳамзамон муовини амниятӣ ва интизомии вазири кишвари мазкур Алиакбар Пурҷамшедиён ва ҳамроҳонаш ба Академияи ВКД Ҷумҳурии Тоҷикистон ташриф оварданд.
Меҳмонони олиқадрро роҳбарияти ВКД ва инчунин роҳбарияти Академия ба таври тантанавӣ бо қаровули фахрӣ ва мизбонии тоҷикона истиқбол намуданд.
Дар ҷараёни ташрифи ҳайати гурӯҳи корӣ зикр гардид, ки сол аз сол ҳамкориҳои дуҷонибаи Вазорати корҳои дохилии Ҷумҳурии Тоҷикистон ва Вазорати кишвари Ҷумҳурии Исломии Эрон дар асоси созишномаҳои дуҷонибаю бисёрҷониба рушду такомул ёфта, ин ҳамкориҳои мутақобилан судманд метавонанд баҳри мубориза бо зуҳуроти номатлуби ҷинояткорӣ натиҷабахш бошанд. Ҳамзамон дар рафти ташриф ҷонибҳо масъалаҳои таҳким бахшидани ҳамкориҳои якҷояро дар омодасозии кадрҳо, мубодилаи тадқиқоти илмӣ ва таълиму тарбия баррасӣ намуданд.
Дар рафти ташриф меҳмонон аз дидани бинои зебо ва шароитҳои таҳсили Академияи ВКД изҳори қаноатмандӣ намуда, зикр карданд, ки Пешвои миллати тоҷикон муҳтарам Эмомалӣ Раҳмон, Ҳукумати Тоҷикистон ва роҳбарияти ВКД Ҷумҳурии Тоҷикистон тамоми шароитҳои заруриро барои муҳассилини ин даргоҳи бонуфуз муҳайё намудаанд, ки боиси таҳсин ва омӯзиши таҷрибаи пешқадам аст.
Сафарзода С.Н., Убайдуллоев Ш. Э.