Тафсир ба Кодекси ҷиноятии Ҷумҳурии Тоҷикистон

Тафсир ба Кодекси ҷиноятии Ҷумҳурии Тоҷикистон пайвастагии нодири донишҳои касбии олимони ҳуқуқшиноси шинохтаи тоҷик дар соҳаи ҳуқуқи ҷиноятӣ ва натиҷаҳои амалии татбиқи Кодексро аз ҷониби судяҳои Суди Олии Ҷумҳурии Тоҷикистон ифода мекунад.

Дар китоб меъёрҳои Кодекси ҷиноятӣ ба таври муфассал таҳлил карда шуда, ба ҷиҳатҳои амалии татбиқи моддаҳои он диққати махсус дода шудааст.
Дар Тафсир тамоми тағйироту иловагиҳое, ки дар қонуни ҷиноятӣ ва дигар қонунгузориҳои бо вай пайваста ба вуқӯъ омадаанд, ба назар гирифта шудаанд. Дар он таҷрибаи судӣ, ки дар муддати амали Кодекси ҷиноятӣ кор карда бароварда шудаанд ва дар қарорҳои Пленуми Суди Олии Ҷумҳурии Тоҷикистон дарҷ гардидаанд, инъикос ёфтааст.
Тафсир барои судяҳо, кормандони мақомоти прокуратура, таҳқиқ ва тафтишоти пешакӣ, кормандони амалии мақомоти корҳои дохилӣ, мақомоти амният, дигар мақомоти ҳифзи ҳуқуқ, мақомоти адлия, адвокатон, муаллимон, кормандони илм ва донишҷӯёни мактабҳои олии ҳуқуқӣ пешкаш карда мешавад.
Мавриди қайд аст, ки Тафсир ба Кодекси ҷиноятии Ҷумҳурии Тоҷикистон аз ҷониби коллективи муаллифон таҳти роҳбарии Солиев К.Ҳ. - муовини сардори Академияи Вазорати корҳои дохилӣ оид ба илм, номзади илмҳои ҳуқуқ, Ҳуқуқшиноси шоистаи Ҷумҳурии Тоҷикистон, полковники милитсия ба табъ расидааст.