Академияи ВКД бо маҳсулоти худӣ таъмин мегардад

Дар Академияи Вазорати корҳои дохилӣ маъракаи ҳосилғундории картошка аз заминҳои корами назди бинои ин ниҳод сурат гирифт. Дар ин ҳашари дастаҷамъона сардори Академияи мазкур генерал-майори милитсия Шарифзода Файзалӣ Раҳмоналӣ ва кормандони ин таълимгоҳ бо дили гарму нияти нек саҳмгузорӣ намуданд.

Тавре дар суҳбат бо мо муовини сардори Академияи ВКД оид ба таъминот полковники милитсия Раҳимҷон Додарбеков иброз намуд, имсол дар кишти аввали заминҳои корами назди бинои Академия аз 20 сотих замини киштшуда беш аз 6 тоннаву 110 кило картошка ҷамъоварӣ карда шуд.
Ҳамаи маҳсулоти ҷамъовардаи картошка барои таъминоти курсантону шунавандагон бо хӯроки гарму серғизо равона карда мешавад.
Мавсуф дар идомаи суҳбат бо мо қайд намуд, ки нақша доранд бо анҷом додани картошкағундорӣ, дар ин заминҳо такроран маҳсулотҳои полезӣ ба мисли карам, турбу шалғам, боимҷон, помидор, лаблабуи қанд ва дигар зироатҳо шинонанд.
У. Олим,
Ш. Убайдуллоев