АКАДЕМИЯИ ВКД: ЧОРАБИНИИ ТАНТАНАВӢ БАХШИДА БА ПАРЧАМИ ДАВЛАТӢ

Толори маҷлисгоҳи Академияи ВКД Ҷумҳурии Тоҷикистон имрӯз намуди идона дошт. Барои табрики ҳайати шахсӣ академики Академияи миллии илмҳои Тоҷикистон муҳтарам Кароматулло Олимов омада буд.
Муовини сардори Академияи ВКД Ҷумҳурии Тоҷикистон оид ба кор бо ҳайати шахсӣ, подполковники милитсия Абдулаҳадзода Абдулвоҳид Абдулаҳад ҳозиринро ба ифтихори рӯзи Парчами давлатӣ табрику муборакбод намуд.
Сипас, баъди муаррифии меҳмони олиқадр, сухан ба академики АМИТ муҳтарам Кароматулло Олимов дода шуд.
Олими шинохта ва маъруфи илми тоҷик академик Кароматулло Олимов бо як ҳисси махсус, шавқу рағбати беандоза зиёд дар мавриди Парчами давлатӣ сӯҳбати самимонаю фаромӯш нашавандаро ба аҳли толор ба анҷом расонид.
Олими тоҷик, ки яке аз пайравони содиқи ПЕШВОИ МУАЗЗАМИ МИЛЛАТАМОН маҳсуб аст, таърихи гузаштаву имрӯзаи Парчамдории тоҷиконро бо қиссаҳои ҷолибаш манзури ҳозирин намуд.
Дар қисмати дигари чорабинӣ ҳунармандон бо суруду оҳангҳои дилчасп дар васфи ПАРЧАМИ ДАВЛАТӢ ба чорабинӣ ҳусни гуворо бахшиданд.