Боздиди кураторон ва курсантони Академияи ВКД аз Осорхонаи миллии Тоҷикистон

Осорхонаи миллии Тоҷикистон таърихи зиндаи чандинасраи халқу миллати соҳибтамаддуни тоҷик ба ҳисоб рафта, ба сифати воситаи муҳимтарини тарбиявӣ ва ҳадафи рушди тафаккури таърихии ҳар як шаҳрванд баромад менамояд. Огаҳӣ ёфтан аз дастовардҳои фарҳангӣ-таърихии миллат ба ҳисси меҳанпарастӣ ва ватандӯстии ҳар як шахс мусоидат намуда, инсонро дар руҳияи эҳтиром ба таърихи аҷдодии хеш тарбия менамояд.

Дар иртибот ба ин масъала, дар доираи Нақша-чорабиниҳои Шӯрои кураторони Академияи ВКД Ҷумҳурии Тоҷикистон 28-уми марти соли 2023 курсантони курси 2-юми гурӯҳи таълимии 202 зери сарпарастии подполковники милитсия Нуриддинзода С.Н., курсантони курси 3-юми гурӯҳи таълимии 301 зери сарпарастии подполковники милитсия Раҳимзода Д.М. ва курсантони курси 4-уми гурӯҳи таълимии 410 зери сарпарастии полковники милитсия Шарифзода В. аз Муассисаи давлатии «Осорхонаи миллии Тоҷикистон» дидан намуданд.
Омӯзгорон ва курсантон зимни тамошои толорҳои осорхона бо таъриху фарҳанг, расму анъана ва суннатҳои мили тоҷикон шиносоии бештар пайдо карда, донишу маърифати худро дар самти худшиносию худогоҳии миллӣ ва ифтихори ватандорӣ ғанитар гардониданд.
Зимни боздид аз Осорхонаи миллӣ диққати ҳайати афсарону курсантонро толори махсуси туҳфаҳои Президенти Ҷумҳурии Тоҷикистон, бозёфтҳои қадима аз «Тахти сангин», «Саразм», «Ҳулбук» ва дигар маконҳои таърихии халқи тоҷик, ки зимни кашфиётҳои бостоншиносӣ пайдо гардида, аз таъриху тамаддуни қадимаи миллати тоҷик гувоҳӣ медиҳанд, ба худ ҷалб намуд.
Ҳайати тамошобинон ба роҳбарияти Академияи ВКД ҷиҳати мусоидат намудан барои боздид аз осорхона ва ба масъулини осорхона ҷиҳати роҳнамоии сатҳи баланди шиносоӣ ба бозёфту кашфиётҳои таърихӣ миннатдории хешро изҳор менамояд.
Нуриддинзода С.Н., куратори гурӯҳи таълимии 202, факултети №2 Академияи ВКД Ҷумҳурии Тоҷикистон, подполковники милитсия