Иштироки курсантони Академияи ВКД дар Ҳамоиши ҷавонон

Бо ибтикори Кумитаи забон ва истилоҳоти назди Ҳукумати Ҷумҳурии Тоҷикистон дар якҷоягӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ҳамоиши ҷавонони касбу кори гуногуни кишвар ба ифтихори 30-юмин солгарди Истиқлоли давлатии Ҷумҳурии Тоҷикистон таҳти унвони «Нақши ҷавонон дар 30-соли соҳибистиқлолӣ: дастовард ва дурнамо» дар толори фарҳангии Кумитаи забон ва истилоҳоти назди Ҳукумати Ҷумҳурии Тоҷикистон баргузор гардид.

Дар баробари ҷавонони фаъол ва болаёқати донишгоҳу донишкадаҳои кишвар ва донишҷӯёни хориҷие, ки забони тоҷикиро медонанд, шаш нафар курсантони фаъоли Академияи ВКД Ҷумҳурии Тоҷикистон низ дар ин Ҳамоиши бошукӯҳ иштирок намуда, достони «Дар ситоиши Пешвои миллат», ки ба қалами шоир Ниҳонӣ тааллуқ дорад, қироат намуданд.
Инчунин курсантони Академияи ВКД дар раванди саволу ҷавоб аз таърихи Парчам, таърихи забони давлатӣ (тоҷикӣ), низ фаъолона иштирок намуда, сазовори «Сипоснома»-и Кумитаи забон ва истилоҳоти назди Ҳукумати Ҷумҳурии Тоҷикистон гардиданд.
Давлатшоева А.