Мизи мудаввар бахшида ба зодрӯзи сардафтари адабиёти муосири тоҷик, Садриддин Айнӣ

Ҳеч як соҳае нест, ки марбут ба миллати тоҷику Тоҷикистон бошаду устод Айнӣ чизе нанавишта бошад. Ӯ пайваста ба таълифи осори манзуму мансур, асарҳои таърихию адабиётшиносӣ, забоншиносӣ ва амсоли онҳо машғул шуда, дар босавод кардани мардуми тоҷик ва ташаккулу тараққии Тоҷикистон саҳми босазо гузоштааст. Аз ин ҷост, ки баъд аз ба истиқлол расидани Тоҷикистон бо фармони Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон нахустин унвони Қаҳрамони миллат ба номи ин бузургвор рақам зада шуд. Айнӣ ба ҳайси донишманди таърихнигор ҳанӯз дар даврони амирӣ бо навиштани асари таърихии илмӣ «Таърихи инқилоби фикрӣ дар Бухоро»(1918) ва китобҳои таълимиаш чун «Таҳсиб-ус-сибён», алалхусус қисмати «Хонадони хушбахт» ҳамчун нависандаи воқеъгаро шуҳрат касб карда буд. Дар 34 соли зиндагии даврони шӯравияш ба сифати шоир, нависанда, рӯзноманигор, таърихшинос, адабиётшинос, забоншинос, мунақид, драмнавис ва дар маҷмӯъ бунёдгузори насри воқеъгаро, бахусус насри реалистӣ ва анвоъи мухталифи он дар адабиёти шӯравии тоҷик шинохта шуд.
Бахшида ба 143-солагии зодрӯзи сардафтари адабиёти муосири тоҷик, устод Садриддин Айнӣ дар факултети №6 Академияи ВКД Ҷумҳурии Тоҷикистон мизи мудаввар таҳти унвони «Аҳамияти тарбиявии ашъори Садриддин Айнӣ» баргузор гардид.

Курсантони курси якуми факултети номбурда аз ҳаёт ва фаъолияти пурсамари устод Айнӣ бо забонҳои тоҷикӣ, русӣ ва англисӣ оид ба мавзӯъҳои ватандӯстӣ дар ашъори устод Айнӣ, роҷеъ ба шахсият ва осори устод, ҷойгоҳи устод дар таърихи навини миллати тоҷик, мавқеи осори Айнӣ дар тарбияи ифтихори миллӣ ва хештаншиносӣ баромадҳо намуда, чорабинии мазкур бо қироати «Марши ҳуррият»-и устод Айнӣ, аз ҷониби курсанти курси якум Самардинзода Саидбухорӣ анҷом ёфт.

Давлатшозода Азиза, полковники милитсия