Вохӯрӣ бо хатмкунандагони Академияи Вазорати корҳои дохилӣ

Имрӯз (17.07.с.2019), дар толори маҷлисгоҳи Вазорати корҳои дохилӣ вохӯрии Вазири корҳои дохилии Ҷумҳурии Тоҷикистон генерал-полковники милитсия Раҳимзода Рамазон Ҳамро бо хатмкунандагони Академияи ВКД баргузор гардида, роҳбарияти Вазорат ҳамаи хатмкунандагонро табрику муборакбод намуда, ба онҳо дар фаъолияти минбаъдаашон барору муваффақиятҳо таманно намуд.

Вазири корҳои дохилӣ зимни суханронӣ зикр кард, ки шумо хатмкунандагони ин даргоҳи илму маърифат анкун корманди яке аз мақомоти бузурги қудратӣ гардидед ва бояд қайд кард, ки вазифаи ҳар як корманди милитсия пеш аз ҳама ҳифзи ҳуқуқу озодиҳои шаҳрвандон ва нигоҳ доштани амнияти давлату миллат аст. 
Дар рафти вохӯрӣ таъкид гардид, ки ҳифзи тартиботи ҷамъиятӣ, амнияти сокинони кишвар, риояи қонуният ва мустаҳкам намудани тартиботи ҳуқуқӣ бе иштироки шаҳрвандон ғайриимкон аст. Такя намудан ба кӯмаки шаҳрвандон ва ташкилотҳои ҷамъиятӣ, яке аз шартҳои муҳим ва самараноки фаъолияти мақомоти корҳои дохилӣ оид ба огоҳонидан ва пешгирӣ намудани ҳуқуқвайронкунӣ ба ҳисоб меравад.

Дар анҷоми вохӯрӣ, хатмкунандагон изҳор доштанд, ки якдилонаву софдилона барои ҳифзи тартиботи ҷамъиятӣ ва пешгирии ҳама гуна амалу кирдори хилофи қонун фаъолияти худро ба роҳ монда, ба Ватан содиқона хизмат менамоянд. 
Абдулмуъмин ЗАЙНИДДИНЗОДА